「獨」女 ^^

 今日晏晝因為要去抽血，同埋再去睇中醫，所以朝頭早就冇返工。咁啱時間睇到呢一套戲，真係好感動！啲人話係婆婆媽媽嘅催淚戲，唔覺得呀，每一個人都有佢嘅故事，冇人想做傷天害理嘅事！不過係的確催淚。兩個多小時，一點也不悶場！

跟住就去隔離打邊爐，覺得自己好「獨」女！啲人會用嗰個毒字！我唔會，我覺得自己幾有型！因為我實在享受me time！ 無拘無束，亦都唔介意人哋嘅目光，隔籬枱幾個人嘻嘻哈哈，我戥佢哋開心，因為我都有咁樣嘅時刻。但係我亦能享受獨處的時刻。飲番杯大紅袍珍珠奶茶（無糖），人生實在美好。不過大病之後，我問自己有冇好大改變，但係我又唔覺得喎。不過對於自己沒有必要的動氣或者情緒，係多咗一份認知！好多嘢其實唔需要咁緊張，知道啫，不過暫時都未即時處理到，或者面對任何事都處之泰然。我會努力學習！

有人話大病之後整個人生都改變，暫時我沒有這樣的感覺，我仍要面對每天的問題和憂慮，但是，我會學習交託給主耶穌，因為他顧念我！亦都係我信心功課的學習。但是每天起來，我仍有生命氣息，我感謝我的主耶穌！