2019.8.14 走難日記

姐姐終於返來了！！！

真係好想記低今次走難日記！姐姐都未試過去旅行好似走難咁樣～ 今次長崎之旅，其實大家都玩得好開心。但係惡夢的開始就在最後一天，當大家去到大塔aeon開開心心揀好晒嘢食之後，姐姐望電話，發現航班取消了！！大家嗰餐飯都食唔落了，不停咁樣喺度搵吓有咩可以做、有咩航班、有咩方法.... 最後佢哋決定先去機場。姐姐都不忘買定兩袋麵包袋住～🥺🥺 因為可能會滯留機場。

去到機場，連counter都唔見... 問吓人，話5:00會公布安排。最終只係貼左張紙出嚟話航班取消，可以安排退款或者重新book機票，再沒有任何安排！姐姐佢哋就馬上睇吓租車是否可以延長，答案是：不可以！姐姐同大舊唯有先去還車的地方，問吓可否延長租車。那位日本叔叔真的很幫忙，經過一輪查詢，他們答應讓姐姐租多一日車，並且在福岡還車。超級感恩！

跟住就睇吓有咩其他方法，因為當時香港機場已經立立亂，朋友的意見都是飛澳門比較穩陣。但是這個「山卡拉」的地方，只有這個hk航空每星期兩三班飛機返香港；而報稱下一班已經滿咗，但係其實根本都唔知佢哋飛唔飛到。😡😡 唯有考慮由福岡飛去澳門，最終佢哋就買咗機票，由福岡飛去台北再飛澳門！之後就展開佢哋嘅走難之旅... 😆😆

由於同行嘅朋友需要再洗血～ 感謝主，腎病院可以幫佢安排在上機之前再洗多一次！佢哋真係服務好好～ 第二次嘅費用仲比第一次平左！超級感恩！

然後姐姐又搵到一間價錢相宜嘅酒店，仲有三間房！佢地在長崎住多一晚～。好嘞！晚上，終於坐低食飯啦，發現....... Book機票嘅時候由於太慌張，把其中一位朋友的英文名打漏了！！！ 真係大鑊！唯有打電話給在香港的豪爸媽幫手，他們總共花了兩個小時幫助我們處理，但是機票上的名字已經不可以改，只可以取消再book！雪上加霜既係，原來姐姐自己個名同姓都倒轉左！！！但是若果取消咗，萬一沒有位怎麼辦！？但是超感恩～ 熱線那邊的哥哥也非常之好人，幫我地hold住條電話線，等待我們book到機票才幫我們取消。😭😭😭 實在很驚險，他們最終買到機票由福岡飛高雄，再飛澳門！超級感恩！

然後他們回酒店，又順利做好五張入台證，並且在酒店有免費印刷！每一樣東西，都有預備。超級感恩！

姐姐後尾發現，飛高雄時間比較充裕～ 如果飛去台北的話，朋友洗完血，再趕往機場時間是非常緊迫的，原來是未必趕到的！感謝主，連我們的錯誤，也有祂的美意和恩典。另外，姐姐買機票的時候，其實也不知道原來買了商務客位！（因為根本冇得揀，只有六個位，姐姐佢哋買了五個！）大家都要花多5000多元，但是真的舒服很多（希望會claim到保險有啲幫補啦！）因為他們舟車勞頓，真係好似走難咁！超級感恩！

還有很多一點一滴的感恩！

1. 順利在颱風來之前離開了福岡！其實他們揸車去到福岡的時候，天色已經開始轉壞，在公路上，架車都比大風吹郁！
2. 順利幫朋友安排洗血！姐姐仲有機會送了五色葡萄給醫院院長，並且跟他講了一次簡單福音～
3. 第一次買機票時，姐姐加左$買可以退票的機票，如果唔係就真係血本無歸！
4. 由於時間鬆動，可以吃飯，休息，享用貴賓室。真係人生冇幾何，原來有錢真係幾唔錯😂😂😂
5. 如果唔係去到福岡，姐姐就買唔到東京いちご比哥哥和阿嫂。
6. 喺高雄，佢哋都買到啲面膜！😂
7. 返到澳門，他們講得到搭夜晚7:00的大飛，回香港了！

在整個過程裏，姐姐感受到天父大大小小的恩典，再一次看見「微細調配中讓我得益處」，都是天父無微不至的看顧。在這個經歷裏，姐姐除了感謝主之外，亦都感謝朋友們的體諒，姐姐要handle所有嘢，而且我們有一位腎病之友需要安排和照顧，實在會好緊張和燥底，但是他們都很包容和合作！這兩天，大家真是一同經歷患難，著草，有同伴真的好寶貴！

但是這個經歷，讓姐姐對出門有點恐懼，原來不能回家的感覺是十分恐怖的！還有颱風衝着來，萬一再delay... 姐姐實在支持唔住！ 2019年的8月14號，實在是一個值得紀念的日子！😭😭 其實在那兩天，姐姐根本忘記了自己的生日了！

無論如何，這個深刻經歷，除了感恩，只有感恩！同時，希望我們的家。。。香港都可以『康復』。

長崎剪影

好多人都會問姐姐，長期有咩好睇呢，咁就等小米帶大家睇吓嗰度嘅風景(^ ^) 佢的確係一個山卡拉嘅地方，每星期只有兩三班直航機，喜歡睇風景嘅、歷史古蹟，其實都有唔少景點。

姐姐佢地一落機就見到咁靚既夕陽了! 真係好靚呀!!!

 

佢地去既第一個景點就係軍艦島, 本來係可以上埋島參觀既, 不過因為發現有石綿, 對身體有危險, 所以就被取消了, 佢地係經"Japanican"預約, 果邊好有交帶, 仲打埋長途電話來通知同確認, 果日都有唔少日本人來遊客一起上船。

姐姐佢地第二三晚book左呢間係半山既酒店, 吃早餐既地方都好好景色呀! 

https://www.lukeplaza.co.jp/e/

 佢地又去左26人聖人記念館

 http://www.26martyrs.com/

在長崎的眼鏡橋

長崎夜景

 九十九島, 真係好好天. 好靚!! 感謝主!!!

由於太多照片了, 姐姐都係揀幾張分享...呵呵...... 

真係好開心見到佢哋呀

姐姐中咗獎啊，不過當佢話俾人聽嘅時候大家都好驚佢俾人呃。話說係咁嘅，姐姐喺面書嗰度，參加了一個Sport Channel既遊戲，贏咗嘅可以去睇球賽。姐姐真係中左獎呀，除咗有門票之外，仲有五星級酒店一晚同埋來回接送，仲有個禮物包添啊！大家都會覺得，邊有咁大隻蛤乸隨街跳。

收到嗰度嘅聯絡之後，真係好開心呀！本來有一位朋友話會同姐姐去，不過後尾突然有事去唔到。當時姐姐感到非常之徬徨，唔知點算好！但係阿嫂原來已經請咗假，可以陪姐姐去啊！姐姐覺得今次有阿嫂陪住係最好同埋最適合㗎。因為只有阿嫂咁有耐性有咁冇所謂地陪住姐姐瘋癲！好感恩，好開心呀!

哥哥送咗我哋去集合地方，見到我哋上車，佢先至走啊。佢好似都好唔捨得阿嫂咁呀～ 真係好溫馨。電視台安排得非常之妥當，我哋有車送去酒店，然後再由酒店送我哋去運動場，睇完波又來接返我哋！第二日食埋個酒店自助早餐，再來接返我哋返香港。

姐姐最開心梗係見到佢啦！呵呵呵！更加開心嘅，就係球隊贏咗，捧杯！！！ 姐姐係第一次喺現場睇球賽架，阿嫂仲去問人點樣攞支旗，真係好好啊！而最SURPRISE既係佢地都係住呢間酒店呀!!!!!  

 門票價值RMB1599!

7號仔呀!!!!

呢件事令到姐姐覺得，天父是最了解我們的需要，同埋真係一份好寶貴嘅禮物呀！係一次好好嘅經歷啊！

一年一度夏令會

一年一度的夏令會，剛剛過去了，感謝主，雖然最後一天打風，但是都大致都順利！辛苦晒一班總務，他們的付出，求主祝福紀念！姐姐今年都有幸可以「落場踢波」，參與事奉，是恩典！

佢想喺呢度整理下啲思緒～ 有很多零零碎碎的片段，都很深刻。

1） 靈魂的錨⚓

我們的確活在一個動盪的世代，姐姐想到，從來沒有諗過自己是身在亂世。不過在今時今日的香港，的確有這感覺。但是什麼叫我們能夠在這環境仍然有盼望呢，就是忍耐和信心，還有神的應許。因着這樣，我們就能夠堅持！的而且確， 因着主，我們內心有一份確切的平安和盼望。當然看到那些令人傷感的畫面，心裏邊實在很難過，但是我們卻盼望着更美好的家，在哪裏沒有眼淚、沒有疼痛！在新天新地裏，獅子和人就像朋友般相處～ 唔知到時係點嘅呢？😀

2） 亞伯拉罕的信心

當人願意順服神的旨意，心裏就有平安。神的恩典給人裏面有穩妥。讓我們也學習亞伯拉罕的信心，他敬畏神，沒有將最愛的留給自己，神就給他更大的祝福。亞伯拉罕獻上以撒，不就是帶出了復活的觀念嗎？👶

3） 人生在世上，都會嘗試尋找自己在這世上的功能和位置。彼得是一個平凡人、普通人，卻是一個蒙召的人！作為一個漁夫，能夠打漁成功，是神跡嗎？當神介入一個普通人的生命裏面，他雖然仍是一個 "普通人", 但他的生命就不再普通。人要放低自己自以為「最強的」，就是自己，正如彼得遇見主，生命就經歷翻天覆地的改變。🐟

4) 救恩的呼召

平時很少想到，能夠得救都是一個呼召。但確實是這樣，因為恩典不是自己應得的。📍

5) 比微塵更小的

牧師分享到，他和五位生死之交，在浩瀚的星空下，願意被主使用。的而且確，在浩瀚的宇宙中，我是誰？可以用approaching zero來形容吧。但是主耶穌告訴你：『你在我心目中，你有重量！』聽到呢度真係好感動，我們不配，也配不起，但是在我這個平凡人中，主也有心意，祂呼召我進入祂的世界。當人與神相遇，他的生命、世界觀、價值觀、都改變，他們知道什麼是重要，什麼事不重要。💫💫💫

6) 拼圖上的一塊

當神創造天地的時候，原本圖畫好美麗，可惜因為罪的緣故已經變成一塌糊塗了耶穌來這個世界「道成肉身」，就是要將這幅圖畫 Restore~ 也就是我們盼望和等候的新天新地。原來在這一塊拼圖中，我有一份兒！可能我這片小拼圖，真的很小很小，甚至沒有什麼圖案在當中，但是。。。竟然。。。我在上帝榮耀的故事中也有一份。嗚嗚...... 當我們願意回應聖靈在心中的引導時，我們也能夠改變別人的生命軌跡，即使我們自己也看不透、看不通。這個給我們生活為人一個很好的提醒！生命不再是無聊的。☄☄

7) 人如何面對苦難💪

1. 知道苦難是有限期的，會完結的
2. 知道苦難是有意義的，不會白白受苦的，我們就學到凡事謝恩
3. 知道苦難中神與我同行，這樣的話，苦難變得有意義。

8) 落場打波的「麥哥利」⚽

牧師從小很喜歡打波，但是他生得個子很小，沒有人會揀他進入自己的隊伍。因為他沒有抵抗能力，他就是麥哥利，有勇無謀。佢講得真係好搞笑啊，不過當想到，我們本來就沒有資格，神俾我哋落場。

9) 恐懼與憂慮😱😰

天父真的很奇妙，的確在我心靈中將要面對一些事情是我很恐懼的。牧師說，憂慮和恐懼是不同的。我哋可以嘗試畫一個表，一邊是『可以控制』，另外一邊是『不可以控制的』。我哋唔使俾人教，與生俱來就懂得恐懼。憂慮卻是經過思考的，覺得那些事情重要，就想去控制卻又控制不了。原來憂慮是與思想掛鉤的，我們如何面對憂慮，就是。。。去意識到那些控制不到的事情，就把它交給神吧。

那麼，如何面對恐懼呢，就是去找那些更值得我們『恐懼』的東西。天父彷彿給我一個答案，只有神值得我們去懼怕，或許不應該用懼怕來形容，我們應該敬畏神。當我們敬畏神的時候，就沒有其他事情我們需要去懼怕/擔憂，物質、健康、家人、還是什麼呢，這一切都掌握在神的手中，我們真正需要去驚的是神怎樣看。當我們敬畏神，行在衪的心意當中，做衪要我們做的事，就可以天不怕地不怕。

每年一度可以安靜下，實在很美好！雖然係CAMP入面其實好多事情要處理，但是讓主的話提醒和更新自己，實在寶貴！💟💟 又是拍一拍膝頭上的灰塵，再向前走的時候了！🙋

每一次...

每一次有需要嘅時候，總是有嫂嫂陪着，謝謝你！你說：「因為我是你的嫂嫂！」感動的眼淚不期然流出來！係我嘅生命入邊，沒有一個人常在我身邊，卻有很多小天使，更寶貴的，就是有哥哥和阿嫂。 因此自己怕麻煩別人的性格，讓我覺得很不好意思，但有些時候真的很需要陪伴～謝謝你！我同自己講，嫂嫂有需要的時候，我一定要挺身而出！

話說回頭，真的很期待見到佢啊～～呵呵呵！