擁抱無法修補的破碎

 

琴日聽道，聽到一個好感動同埋深刻嘅訊息，很想把它記錄下來。有一個農夫，每日都攞住兩個桶去擔水。其中一個桶係有裂縫，所以呢個桶淨係可以擔到半桶水。

有一日，呢個有裂縫嘅水桶就同農夫講：「不如你唔好用我啦，我都好慚愧，淨係可以擔到半桶水。」農夫就笑咪咪咁同呢個水桶講：「你有冇睇到啊，路旁嘅花朵，就係透過你裂縫流出嚟嘅水而被澆灌，所以啲花可以開得咁茂盛。」農夫又話：「我又可以採摘啲花返屋企裝飾，又可以送俾別人；亦經過呢條路嘅人又可以欣賞咁美麗嘅花朵。」

天父彷彿在一次透過呢一個故事，再一次讓我知道，雖然每一個人生命都有佢嘅破碎、裂痕，我哋可以擁抱破碎！讓呢一啲嘅經歷，成為自己嘅成長記號，亦都可以祝福別人！感謝主。

有趣有趣

終於都完成了台北之旅了。因為九成九的朋友也不贊成我獨個兒去巴黎，我就學習從簡單的做起。一直都好想體驗一個人去旅行，究竟感受係點嘅呢？對於一個嚴重路痴和膽小的人來說，都有不容易的時刻，但回想每一步都有平安，也是學習照顧自己的好機會。一個人的時候可以隨意變動行程，想做乜就做乜～ 其實都很自在。同事問我，一個人去旅行悶不悶？真心的覺得不會沉悶喔～ 因為旅行很忙碌的～有時都感到疲累，因為年紀都大了。😆 並且我很喜歡坐在陽光下咖啡室或者餐廳放空和吃東西。真係很喜歡喔。當然，和朋友一起聊天和吃好東西，也有另一番樂趣。兩樣我都很喜歡。

感謝主，我想去的地方都去了！最開心可以睇花花～ 雖然天氣不太理想，但仍然很滿足。因為冇乜人，不停自拍也不尷尬呢！回程嘅時候，由於地方太偏僻而沒有網絡，怎辦好呢？怎樣回去呢？有少少驚驚，但是下車的時候，都估計到回程的巴士在哪裏坐，最終都安然返到去市中心。一個人的時候，的確係會比平常警醒。

星期日在教會崇拜，聽到一篇很好的道。說到人很怕在別人面前，或許包括家人面前也許未能去呈現真正的自己。當中有一些道理，是明白的。在溫泉酒店看到Good News的一個婚姻見證，當事人原本就是一對金童玉女，但是一路走下去也來到離婚的邊緣，當然最後在主裏婚姻得已修補。從他們身上看見婚姻的不容易和捨己。在回程的飛機上，又看到一齣電影，也提及人對婚姻的期望和落差。哈哈！是主讓我體會到婚姻的不容易，並非人人都適合嗎？在自己的處境當中，我體會到一件事，只有主是我所以倚靠的～能夠單單倚靠主，是我這個身份的福份。別人是不能體會的，他們有他們的功課，我也有我的學習。只有我的主，從來不離棄我，也不灰心。不知道這是否心結的解開，無論如何，多一點體會吧！

牧師有提到，有些人喜歡布娃娃娃傾偈，驟耳聽落去很像很可憐，因為只有布娃娃會安靜聆聽，不會背叛，不會打斷，也不會離開人，也讓人可以活出最自在和真實的自己。對於自小就跟哥哥玩公仔的我，這就是我的自娛和治愈方式，我又沒有傷害人，我喜歡就可以了。但是感恩的是，我有布娃娃，也有不同的傾訴的對象。只是身邊沒有一個男人而已！哈哈～ 

經過今次嘅台灣之旅，盼望有機會再一個人出走！也許會愛上這種體驗呢。🤭

如果你看到最尾，唔介意水蛇春咁長的文字，相信你必定是我的好朋友！❤️❤️❤️

要聽話

 心靈掙扎了好一段時間… 始終都要學習順服。

婆婆灑水禮

呢幾日婆婆情況都唔係太理想，真係希望婆婆唔好咁辛苦。琴日終於鼓起勇氣，問準舅父們，他們都同意讓婆婆接受簡單的灑水禮。其實每一次問婆婆，婆婆都係願意禱告，話自己信耶穌。自從入醫院之後，婆婆由好辛苦～ 慢慢改變過來，感受到她裏邊有一份平靜。雖然食唔到嘢，婆婆係會有唔開心，畢竟都年老了，求主耶穌讓婆婆能夠平靜面對，心裏有着耶穌基督的平安。婆婆自己都說，多謝耶穌！

每當想起婆婆年老衰殘，心裏面就好難過。

探完婆婆之後，經過維園工展會，想起之前她行得走得的時候，每年都會帶她到工展會！其實年年都係買嗰啲嘢，佢會買蜜糖、榴槤威化餅、活絡油，白花油😅😅。現在都冇機會再帶婆婆去行了！🥹🥹

良朋共聚

 姐姐一早就約好咗，去完日本返嚟之後會同KW姐姐去喺呢度！呢個主題，梗係要約最好嘅朋友一齊去啦！喺度輕輕鬆鬆食過下午茶，再晚上打個邊邊，屈膝詳談！冇特別行程，好似好傻仔咁，但係能夠有朋友相伴，真係覺得好值得！好難得可以由朝傾到晚，KW姐姐同姐姐識於微時，一同成長，亦都係同一類型嘅人士，所以都好感恩！

等我哋大家睇吓花絮啦。酒店房間周圍都有見到小丸子同佢朋友嘅影子㗎！

酒店都整咗呢一個影相框架俾人影相，都幾好玩呀

姐姐今次淨係帶咗小丸子去啊。

姐姐特登揀咗巴黎主題嘅房間

都有唔少禮物帶走㗎。

無限感慨

 今日去咗探婆婆。感恩婆婆去咗一間很好的護養院繼續接受康復治療。呢度背山面海，真係豪宅級既地段。不過對於婆婆來講，佢都唔知係咩地方。

一眼見到婆婆，婆婆好似唔認得我咁！慢慢先至記得我係孫女～ 我已經忍唔住喺度流馬尿！真係好鬼冇用！

買咗個水杯仔，以為佢可以用飲管飲水。原來佢已經唔可以飲水。流質嘅東西都要加凝固劑先至可以食到，以免濁親。跟住餵婆婆食糊仔，啲人成日話老人家好似BB咁，原來真係！跟住幫佢梳下頭，抹下面。呢度姑娘都好好，好友善。跟住就同婆婆祈禱，問婆婆耶穌喺佢心入邊好唔好，佢話好！其實婆婆有幾明白福音，天父會知道，求天父喜悅婆婆對祂呼求的心。

生老病死人人都要面對！希望婆婆每日過得舒服啲，心裏有耶穌基督的平安。有時諗，婆婆都有兒女孫兒睇吓佢，自己第時會點呢，都係唔好諗咁多，正如哥哥咁講，主會有安排！老人家需要比別人照顧，不能自主，令人感嘆。想起婆婆，佢未必再返到屋企，日後的安排究竟會怎樣…. 心裏邊感到不容易。她在的時候，感到煩厭，令媽媽很辛苦，有一天她真的要去安老院，心裏都感到難過。😔只能夠交給主！

不過好感恩，覺得自己唔係一個人去面對。琴晚團契完咗，弟兄姊妹為我祈禱；亦都有其他肢體私底下問候我，為我禱告，我真的感覺到有一份力量與我一同面對！還有牧者，堅持陪我搭車，然後她坐原車，出返去市區，實在很溫暖！感謝天父對我的恩典！

風浪

 好不容易過咗呢幾個星期。生命都有一點反思。當風浪臨到，始終要面對嘅，都是自己。沒有人會明白你心靈那份掙扎。有朋友願意聆聽，感恩。有朋友關心，感恩。在風浪中認識了自己更多，原來何等小信和脆弱。即使在困難中，主好像沉默了，但只能夠認定和相信，無論如何祂都是掌管一切。事實上，恩典是夠用的。所以，或許未來，當身邊的朋友面對艱難時，無需要給予太多意見和發問，只需要默默的陪伴，讓朋友知道，你在他們身邊就可以。不批判、不質疑，切切祈禱交給主，就是最大的幫助。