Cycle two
D1: 12月7號/ 乖乖嘅病人，按照姑娘嘅指示三點鐘入院。辦好晒手續，發現其實原來唔使咁早㗎，夜晚8:30先開始吊鹽水。不過早啲入嚟，就冇咁頻撲。感謝主，今次竟然係二人房，仲係窗口位有海景。仲喺度不停咁諗，隔籬床係咩人呢……
尋晚都係瞓得麻麻地，因為隔離位鼻鼾好勁…. 醫生只係俾咗半粒安眠藥我，都入唔到睡，唯有自己食多半粒私伙。第一晚就這樣渡過了。
D2: 好早就起咗身啦，見到出邊嘅日出好靚呀，感謝主！今朝電療好順利，落到去水份足夠，等咗一陣就做啦，仍然係「被耶和華嘅慈愛四面環」。而家慣咗電療，想起邊個就為邊個禱告。其實時間都好快過。不過電療哥哥都知道我聽日未必咁精靈㗎啦。
電療返到嚟之後，就同隔離姨姨傾偈。佢係嚟咗香港20幾年嘅江西姨姨，原來之前佢好多年前都帶過仔仔跟住啲家長返過教會。佢記得啲詩歌：耶穌愛你！咁我就同佢分享吓福音啦，分享吓病嘅經過。能夠提起耶穌嘅名字，彼此鼓勵，佢都係三期嘅朋友呀！佢妹妹會來照顧佢，同埋佢老公都會煲嘢俾佢飲，仲有佢成日會睇吓孫女嘅相片影片。就係佢最大嘅喜樂！仲有有機會同佢一齊祈禱㖭啊。不過佢都係住三日兩夜。下一個回合又遇到咩鄰舍呢？
剛剛落藥了，希望小敏子繼續有精神記錄住院日誌啦…. 六日五夜！
後記：下晝冇咩做，咁我就串吓五色葡萄啦，又同阿姨傾吓偈，咁樣時間就好快過，我仲送咗五色葡萄俾阿姨，佢好高興呀，即刻掛喺電話上面。
跟進我最愛嘅送飯小天使團隊同埋探訪小隊又來啦。真係非常感恩，每一個小天使都係我生存嘅動力！
沒有留言:
張貼留言