婆婆灑水禮

呢幾日婆婆情況都唔係太理想，真係希望婆婆唔好咁辛苦。琴日終於鼓起勇氣，問準舅父們，他們都同意讓婆婆接受簡單的灑水禮。其實每一次問婆婆，婆婆都係願意禱告，話自己信耶穌。自從入醫院之後，婆婆由好辛苦～ 慢慢改變過來，感受到她裏邊有一份平靜。雖然食唔到嘢，婆婆係會有唔開心，畢竟都年老了，求主耶穌讓婆婆能夠平靜面對，心裏有着耶穌基督的平安。婆婆自己都說，多謝耶穌！

每當想起婆婆年老衰殘，心裏面就好難過。

探完婆婆之後，經過維園工展會，想起之前她行得走得的時候，每年都會帶她到工展會！其實年年都係買嗰啲嘢，佢會買蜜糖、榴槤威化餅、活絡油，白花油😅😅。現在都冇機會再帶婆婆去行了！🥹🥹

良朋共聚

 姐姐一早就約好咗，去完日本返嚟之後會同KW姐姐去喺呢度！呢個主題，梗係要約最好嘅朋友一齊去啦！喺度輕輕鬆鬆食過下午茶，再晚上打個邊邊，屈膝詳談！冇特別行程，好似好傻仔咁，但係能夠有朋友相伴，真係覺得好值得！好難得可以由朝傾到晚，KW姐姐同姐姐識於微時，一同成長，亦都係同一類型嘅人士，所以都好感恩！

等我哋大家睇吓花絮啦。酒店房間周圍都有見到小丸子同佢朋友嘅影子㗎！

酒店都整咗呢一個影相框架俾人影相，都幾好玩呀

姐姐今次淨係帶咗小丸子去啊。

姐姐特登揀咗巴黎主題嘅房間

都有唔少禮物帶走㗎。

無限感慨

 今日去咗探婆婆。感恩婆婆去咗一間很好的護養院繼續接受康復治療。呢度背山面海，真係豪宅級既地段。不過對於婆婆來講，佢都唔知係咩地方。

一眼見到婆婆，婆婆好似唔認得我咁！慢慢先至記得我係孫女～ 我已經忍唔住喺度流馬尿！真係好鬼冇用！

買咗個水杯仔，以為佢可以用飲管飲水。原來佢已經唔可以飲水。流質嘅東西都要加凝固劑先至可以食到，以免濁親。跟住餵婆婆食糊仔，啲人成日話老人家好似BB咁，原來真係！跟住幫佢梳下頭，抹下面。呢度姑娘都好好，好友善。跟住就同婆婆祈禱，問婆婆耶穌喺佢心入邊好唔好，佢話好！其實婆婆有幾明白福音，天父會知道，求天父喜悅婆婆對祂呼求的心。

生老病死人人都要面對！希望婆婆每日過得舒服啲，心裏有耶穌基督的平安。有時諗，婆婆都有兒女孫兒睇吓佢，自己第時會點呢，都係唔好諗咁多，正如哥哥咁講，主會有安排！老人家需要比別人照顧，不能自主，令人感嘆。想起婆婆，佢未必再返到屋企，日後的安排究竟會怎樣…. 心裏邊感到不容易。她在的時候，感到煩厭，令媽媽很辛苦，有一天她真的要去安老院，心裏都感到難過。😔只能夠交給主！

不過好感恩，覺得自己唔係一個人去面對。琴晚團契完咗，弟兄姊妹為我祈禱；亦都有其他肢體私底下問候我，為我禱告，我真的感覺到有一份力量與我一同面對！還有牧者，堅持陪我搭車，然後她坐原車，出返去市區，實在很溫暖！感謝天父對我的恩典！

風浪

 好不容易過咗呢幾個星期。生命都有一點反思。當風浪臨到，始終要面對嘅，都是自己。沒有人會明白你心靈那份掙扎。有朋友願意聆聽，感恩。有朋友關心，感恩。在風浪中認識了自己更多，原來何等小信和脆弱。即使在困難中，主好像沉默了，但只能夠認定和相信，無論如何祂都是掌管一切。事實上，恩典是夠用的。所以，或許未來，當身邊的朋友面對艱難時，無需要給予太多意見和發問，只需要默默的陪伴，讓朋友知道，你在他們身邊就可以。不批判、不質疑，切切祈禱交給主，就是最大的幫助。

Beach

 

姐姐真係好耐冇去過海灘啦，今日可以同朋友一齊去，好開心。天氣好好，曬到暈低！去到海灘都要戴口罩，係咪傻嘅呢。香港仍然有四人限聚令，都有啲人嚟巡邏同埋派宣傳單張。我哋都盡量守規矩啦。但係喺沙灘上面唔落水，真係好辛苦。落到水真係舒服晒！

完咗之後，一齊去食個lunch。食物味道就普普通通啦，但係飲番杯特飲真係透心涼。尋日團契時間，主持人問，有咩令自己開心？其實姐姐琴日團契之前買咗一個魚蛋牛腩河，因為好耐冇食呢間，覺得都幾好味。其實已經好開心。最近同朋友傾開計，知道有啲人，住大屋，揸靚車，卻係面對人生種種嘅問題，只係外人唔知道。所以有時啲嘢都係「你睇我好，我睇你好」，唔使羨慕人。每個人都要面對自己生活嘅挑戰同埋重擔，姐姐今日睇到傳道書：「原來印在日光之下，莫強與吃喝快樂，因為他在日光之下，神賜他一生的連日，要從勞碌中時享受所得的。」感謝天父，賜給我們已經很豐富呢！

假期完結了

 四日嘅復活節假期，匆匆又過去了，悠悠閑閑地過了。

4月16號，是小C小P姊妹爸爸安息聚會的日子。姊妹懷着懷念的心情送別她們的爸爸。為世伯感恩，因為他有一對孝順的女兒。小C姊妹那份常存感恩和感謝的心，實際令人欣賞。她也非常着緊父親信主，相信天父也憐憫。雖然是不捨，但是天家的盼望是最寶貴的。剛剛正在預備查經，主再來的盼望。讓我重溫了，我們的盼望就是等候主耶穌基督回來，到時候，就可以與愛我們的主耶穌永遠在一起。雖然沒有見過祂，但是祂確實住在我的心裏，每天與我同行。❤️❤️ 

 依家實在是很少運動，不過這個假期也叫出去走走了一次！年紀大，郁一郁都好似容易會拉親😆 真係冇鬼用。

假期，姐姐最鍾意就係吃東西！

清真牛肉館的牛肉餅，果然名不虛傳，但是沒有拍照片，這個高力豆沙都很好味呢！

 

難得去了九龍城，當然唔放過shopping的機會！這個芒果糯米飯，小蓮都讚好。

小焗爐真係好方便呢，帶來很多樂趣！

昨天吃了一個悠閒的午餐、傾傾講講又一天了！

 

假期，就是這樣簡簡單單地渡過。

分離症

 疫症將人分離.. 平日星期六，會同媽媽飲茶，又或者同哥哥食早餐。因為疫症實在太嚴重，姐姐都沒有和哥哥吃早餐了。因為姐姐很怕自己有病，會傳染給哥哥。偏偏，我家的小蓮媽是一個勇者無懼的人，佢根本不怕疫症，亦都唔怕會影響別人。我們都知道，不用太緊張，但係連基本的都沒有做好，勸勉她卻招來狠狠地被駡，姐姐實在覺得很可憐。

中招的人，只能屈在自己的房間，因為害怕傳染人。還未中的人，心裏就思想可是到自己？疫症不可怕，心靈沒有平安、要與人隔離才是最可怕。還有，姐姐的豆腐膶公司，只得小貓三隻，倘若一鑊熟，公司就不能運作！也是令人憂慮的～ 

求求天父，讓疫情快快過去…. 人與人之間的分離，實在太令人受不了！ 嗚嗚…… 

小敏子蛇仔日記第1-2天

 姐姐決定將佢同蛇仔嘅經歷寫出嚟！記錄一下！

第一天（發現蛇仔！）15/2/2022

事情係咁嘅，係上星期四（10/2）姐姐打咗第二針，一直都相安無事，直到星期日/一左右，佢就下巴生瘡。姐姐不嬲成日都下巴生瘡，所以都冇乜特別留意。大約前日開始（14/2）發現唔對路，因為啲瘡瘡係有水pok的！由於而家睇醫生非常唔容易，姐姐本來都諗住拖一陣，不過佢最終都決定琴日去咗睇醫生，雖然都排左1.5小時隊，但係感謝主，最終佢都睇到醫生。醫生一見到，就話係「異常！」問診之下發現，姐姐有生過水豆，亦都生過蛇，亦都打咗蛇針。好明顯今次係因為打疫苗引發出來的副作用。嗚嗚….. 但係都算係黃金72小時之內開始食藥，希望藥控制得到啦！

喺未知道係生蛇之前姐姐就諗好多嘢，因為嗰陣時啲淋巴覺得痛，就諗係咪死啦！有淋巴X! 我哋姐姐免疫系統真係有啲問題，所以佢先唔想打針！所以話，其實真係唔係人人適合打疫苗的！呢個係我親身嘅經歷。

第二天（蛇仔繼續攻擊！）16/2/2022

今日姐姐喺屋企休息，感謝主琴晚都瞓到覺，雖然林起身嘅時候都覺得好痛，左邊面伸延到耳仔、下巴都好似比野錐咁！冇陰功…… 真係好鬼痛！特別係食完藥，但當藥力過去之後，蛇仔嘅襲擊就好明顯加強，神經線痛真係唔係講笑！跟住媽媽見到姐姐嘅傷口，姐姐嗰一刻就忍唔住喊！覺得自己好慘….. 跟住媽媽就叫姐姐「要堅強啲！」冇錯! 做人要堅強啲！靠主面對！都有好多朋友同埋肢體慰問姐姐，相信佢哋都有為姐姐祈禱。姐姐聽日要返工啊，因為真係有事情要處理。所以佢就查吓，蛇仔病究竟日文點講！☺因為都要話俾老細聽佢自己發生咩事….. 跟住佢就搵到以下圖片，真係幾得意喎！哈哈！

今日下晝嘅時候，姐姐見到條腰好似都有微微嘅紅疹！希望蛇仔唔好咁啦，唔好搞姐姐啦！相信姐姐都要繼續同蛇仔共存，求天父保守姐姐平安面對。

https://www.saiseikai.or.jp/medical/disease/herpes_zoster/#

送給自己的

 新年最開心就係買野比自己啦。姐姐一直都想訂佢哋㗎，不過運費不便宜，所以佢都諗咗好耐先訂！呵呵，今天終於到了！好靚仔呀！

白色嗰件係姐姐最鍾意嘅！趁今日好天，嗱嗱聲洗乾淨開着先！藍色嗰件有少少窄～ 運動款，唔知會唔會洗洗下就鬆呢？！

年廿九買嘅嗰速玫瑰花，今日年十一，仲有幾支狀態都唔錯。呢一度係開得最靚嘅，🌹睇見都開心。

平平安安

 今期疫症無啦啦又爆發得咁犀利，日日睇住數字飆升，叫人嘅心都感到不安呢….但係作為小市民，又不能瞇埋眼當咩都睇唔到扮唔知。喺呢個狀況入邊，真係唯有認定主賜平安，同埋掌管一切，唯有以「煮到埋嚟就食嘅心情」去面對。

前兩日睇到呢段經文，心裏邊都有安慰。呢排香港都凍， 15至16度，其實姐姐就最鍾意呢種天氣，可以着厚少少嘅衫都唔會流汗！無論是風或雪～ 只有神話落就落，要停就停！咁佢咪大晒，係㗎～ 不過因為佢係我嘅主～ 我知道一切都掌管喺佢手中，咁就唔使擔心太多。亦都可以放心！學習放心！感謝主，因為祂是我的主。