雲上太陽不改變

星期六，平日的星期六，可以同哥哥食吓早餐，或者同媽媽飲茶，下午約吓朋友相聚。這個星期六，未能入院，趁精神，返工處理一些事情。實在是一個賤骨頭，返咗工晚上瞓得好一點。事實上，可能清清手頭上的工作，也會安心一點。未能入院，在月尾能夠做到一啲嘢，原來是好的。

搭車時見到雲上太陽，是天父告訴我，祂的愛永不改變。事實上，是有點情緒的，大家都開開心心地過週末，自己都會問，我何時可以做返正常人呢？😔🫣 治療的道路是漫長的…. 求主給我持久的信心，努力地走過。

隨遇而安的功課

 本應以為，星期一要再入院進行第二cycle的治療，殊不知，白血球不合格！要留班！一聽到，感到沮喪，我明明覺得自己的狀態都不錯，為什麼白血球不合格呢？這樣，治療便要延遲嗎？

經過一輪心理的調整，既然不合格，只能夠接受。咁大個女都未試過留班。天父有祂的計劃和時間表，祂所安排的和預備的是最恰當的。就安然地乖乖地在休息，這幾天都要打升白針提升白血球。感恩，由於每天都要回去做電療，所以醫院願意幫我打針。否則，是要自己出去打的。

隨遇而安的功課不容易，但是有主和姊妹同行陪伴，已經很感恩。謝謝主。

再一次被這經文提醒：人的腳步為耶和華所定，人豈能明白自己的路呢？（箴言20章24節）

只管相信和跟隨，安然地接受神的安排和帶領就是最好的。😊🙏

小敏子住院日記

D1: 11月3日（星期一）

第一日來到這裏，心裡有點驚驚，看見病房的病人很病容…. 要適應這個環境，求主給我平安的心。感謝詠雯和B嫂送我入院；B哥路經買了雞絲湯河給我吃；哥哥嫂嫂來陪伴我。八點幾，開始要吊鹽水了。要拖住部機周圍行。

D2: 11月4日（二）

經過一晚持續的醫療機器聲、十九床位不斷的撳鐘聲、旁邊女士的呼叫聲….  加了半粒很苦口的安眠藥，感恩總算睡到。由入院那一刻，見到旁邊那位女士的面容，心裏很恐懼，今天見到護士們不斷觀察她的狀況，似乎都不樂觀… 最終都被送往別的病房了。聽說她的親人都不在身邊，為她感到難過，盼望她已經信主。只能為她能夠安靜地睡覺禱告….. 

詠雯姊妹為我預備了豐富的午餐。好好味喔！沛韶姐也來了探望，她昨晚在WhatsApp 唱詩歌給我聽，叫我不要驚怕。

而家開始落化療藥了，兩小時後去電療啦，已經食咗強力止嘔藥。護士哥哥話通常冇咁快黎料🙏🙏

讓主駕駛

睇返上一次寫網誌，係差唔多五個月之前嘅事。估唔到幾個月之後生命有咁大嘅變化！

一直以來自己嘅人生，都係自己坐喺駕駛座，好習慣揸住個軚盤，一切喺自己嘅掌控裏面，先至有安全感。今日我嘅生命，極需要去學習，讓主耶穌駕駛，我就乖乖地、安心地坐喺司機旁邊，欣賞周圍嘅風景。即或喺疾病裏面，仍然能夠看得見恩典、風景。我要相信，主耶穌係最安全、最穩妥、最偉大嘅生命駕駛者。主會帶領我！俾我力量嚟到去走過。

事實上，只係短短過多月，我們都看見很多奇妙的帶領，家人、弟兄姊妹、好朋友的支持愛護和幫助。怎麼我還擔心太多呢？！學習let God control🙏😊

大樹

上個月的今天，是老闆離世的日子。經過一個月時間的消化，慢慢習慣過嚟。最艱難的日子總算渡過，不過都知道，前面仍有很多困難和挑戰。但是我確信，我的生命和公司一切都在我主耶穌的手中，因為我已經交託了，即使偶然會懼怕和擔心，只能學習迎難而上。今天看到老闆的房間，心裏邊都掛念他，盼望他真的已在天家安好。這小熊是很多年前買的，當時覺得他的裝扮很像老細。一直都屹立在櫃頂，最近我把他放在窗邊。

今早聽到一段靈修分享，實在彷彿在閱讀我的心聲。是的，大樹雖然已經不存在了，既然是天父容許。確信靠着主，在磨練中自己可以變得更堅強。

Remark: blogger日期有啲出入。老闆是5月20號走人的。

旅程點滴分享

寫開又想寫吓喎。姐姐都係想喺呢度記錄下自己嘅感受，即使應該冇人睇。👀 睇返自己寫嘅嘢，就會想返起當時嘅感覺。點解話今次去旅行會咁大壓力呢，因為姐姐有一個團友是需要去洗血的，姐姐要幫佢安排洗血。而呢位團友最近心臟唔係好舒服，所以姐姐都發散晒人為佢禱告，求主保守一切平安順利。人命關天，真係不得怠慢。

另外嘅就係，姐姐好想去探患病嘅舊日本同事，因為始終都係重病，好想同佢傳福音。不過唔識點做，唔識點講，所以姐姐都寫定一張卡和一封信，將想同佢講嘅寫低咗。雖然當時的確冇乜機會同佢講到福音 (只係有少少帶過)，但係相信佢都明白姐姐嘅心意。我們只能作傳遞的那一個，信與不信，真視乎當事人和主的恩典。只管進去傳講。整個過程心裏面都有平安！見到和田先生雖然疲倦，但係胃口都好好，感恩！當他送姐姐去車站嘅時候，忍唔住抱咗佢一下，叫佢加油！當姐姐同佢揮手道別嘅時候，都不知道再有沒有機會見到他了。就算依家見唔到，希望第時喺天家度都見到啦！

講返旅程，姐姐佢哋今次主要目的係睇富士山！富士山好怕羞㗎，第一日出嚟咗一陣，就一直比雲遮住啦。直至我哋要離開，佢終於出現啦！真係好可愛啊！今次姐姐佢哋去咗試豪華露營，真係好好的體驗！露營竟然有得浸私人溫泉同埋桑拿！的確係有啲貴，但係感謝團友願意配合，佢哋都覺得係一個好特別嘅體驗！講真同呢班團友唔係話可以講心事嗰一種，但係都係好似屋企人咁，大家都可以表露真性情。😆 相處最緊要舒服，唔使扮嘢！都要珍惜友誼！畢竟大家都一齊共渡患難！

 

感謝

 好想記錄吓今年生日嘅感覺。呢個八月實在好忙碌，因為有夏令會，然後就要去旅行。今次去旅行前一點都不興奮，反而有很大壓力。感謝主，一切已經渡過了，滿滿經歷主所賜的平安。更加體會自己嘅軟弱，特別喺困難同埋挑戰嘅裏面，無論點樣安慰自己、禱告，都好似有舊石頭壓住咁！就好似明明坐喺車上邊，自己就死都唔肯將個背囊除落嚟，孭住重擔！真係傻仔！可能一直以來，做人做事都慣了喺自己控制嘅範圍入邊。

今年嘅生日靜靜地咁樣渡過咗，晏晝同同事吃飯，唯一一個同事，她竟然與我同月同日生！晚上，請咗家人吃飯，媽媽生我咁辛苦，請佢食飯都好應該。👩💋好感謝每一年都特別記得我嘅好朋友，他們的每一個祝福都很窩心。記得你嘅，未必要向你祝福。就算好朋友，因著生活忙碌遺忘了也一點不出奇。畢竟，生日都不算什麼，要學懂，莫失莫"望"。緊記着為我花心思的好姊妹！

多謝主！生命全是恩典！

想講一講，今年人生真係展開新一頁，寫呢篇網址嘅時候，已經要用老花眼鏡了！哈哈哈！