姐姐明天畢業了

感謝主！姐姐明天畢業了！

今朝她一早起床，開工整曲奇！

預備送俾明天嘅來賓～

多謝大家願意抽空出席～

姐姐希望聽日平安渡過！

姐姐都覺得佢哋好搞笑啊。

呢款朱古力曲奇～姐姐減咗糖～微微苦添！希望大家唔好介意啦。係用新鮮越南帶回來的腰果整架！

遊峴港～餐廳篇

因為人生路不熟嘅緣故，姐姐佢哋都揀定晒餐廳先至來～上tripadvisor真係有千千萬萬個選擇！原來排第一位嘅，未必係最推介。姐姐佢哋第一餐就嚟咗呢間 Ngon Villa Danang, 環境同埋服務都不錯。主要做遊客生意... 所以服務會好好，亦都坐得好舒服，不過唔太地道。佢哋係任食的，有個list俾你揀，不過你唔會知道想揀咩，然後一個服務好好嘅姐姐就會來到幫你揀...整體感覺，都可以一試既。

睇環境都覺得舒服呢... 姐姐佢哋見排第一位，慌死冇位，點知嚟到係冇人嘅....

一嚟到梗係試番杯越南咖啡，不過超苦，加咗煉奶亦都好難飲！總之就唔係姐姐嘅口味！


去完樂天超級市場之後，姐姐佢哋已經攞到一手野! 所以只係在樓下呢間回轉火鍋店打邊爐，整體感覺是。。。。中伏！叫做食到多啲菜咁解～其餘嘅都唔特別，但係每人要一百幾蚊～喺呢度就覺得好唔抵啦！




而整個行程入面，姐姐覺得最好食嘅就係呢間Pho Bac 63 河粉！真係超級好味！難怪網上有朋友仔嘅comment係話四個人食咗八碗！姐姐亦都好同意佢嘅講法！

叫多咗碗豬肉丸都覺得好好味！


團友仔小美姐姐係一位咖啡迷，去到邊都要飲咖啡，姐姐痴飲左一啖，感覺：唔係佢口味！


經朋友仔介紹，佢哋係會安就去咗呢一間Morning Glory食晚餐，果然係好介紹！不過呢間野好多人，坐得唔算太舒服，因為枱與枱之間都好近，有啲迫，不過服務都可以。




來到峴港，重頭戲當然係食海鮮。不過唔好意思，姐姐唔知道呢間野叫咩名，因為係朋友帶來的！整體感覺都好味～ 因為姐姐唔食辣，食咗蒸蟹！好多膏！六個人食咗九百幾蚊～ 價錢都好合理！

遊峴港～景點篇

姐姐佢哋四日三夜嘅行程其實唔係去咗好多景點，只係去咗三幾個！第一個景點就係呢個粉紅色嘅教堂啦，來到嘅時候～哇！真係幾靚喎，都影咗唔少相。

峴港既藍天都好靚呀


佢哋亦都去咗呢個Con Market~ 講真其實冇咩好買，因為係啲好地道嘅東西... 感覺有啲似街市！不過叫做去過下啦。都買到隻好抵嘅咖啡杯！




另一個著名景點，亦都係一定要去嘅就係會安！喺峴港呢個地方，四圍其實都唔多人。整個旅程見得最多人嘅就係呢度！亦都好值得來！晚上四圍都係燈籠，好靚呀。呢度嘅餐廳食肆亦都有非常之多嘅選擇～真係花多眼亂！

晚上呢樹亦都有得放水燈～不過姐姐佢哋驚跌落水，梗係唔會坐啦！


另一個景點就係巴拿山～ 嗰個纜車真係好高呀！海洋公園嗰啲真係冇得比啦！上網做左功課，都知道嗰度天氣係會好飄忽，大家都準備好晒傘同埋風褸，的確係幾凍嘅！同埋真係會落雨！網上有啲朋友話食肆唔多，但係姐姐佢哋都食到隻幾好味嘅燒雞！

其實感覺呢度似海洋公園～遊客必到嘅地方。同埋真係幾大！










姐姐係坐酒店嘅book車嚟到，司機會幫佢地買飛，當然佢會收返少少手續費！咁就唔使排隊！基本上內巴拿山嘅朋友都會book定來回車～司機會回來接你。姐姐佢哋book咗七人車，因為車程都要一個鐘就想坐得舒服啲，不過呢架車就普普通通囉。

基本上姐姐佢哋只係嚟咗呢幾個景點～其餘嘅時間都係Hea～ 同埋做Spa~ 渡假係咁上下啦。(o^^o)

遊峴港～ 酒店交通篇

姐姐終於有時間整理下今次嘅旅程，喺網上面睇咗好多唔同嘅資料，發現原來睇YouTube片係更加清楚，原來好多朋友都花咗好多時間整呢啲片去介紹，真係有心機！

姐姐佢哋住嘅酒店距離熱鬧嘅地方市區係比較遠啲啲, 一般市區內既酒店由機場去只需要15分鐘左右，姐姐佢哋呢間需要30分鐘車程，不過其實去得渡假，去Resort應該係比較合理的～而且喺呢個地方， call Grab taxi係一件極度方便嘅事。（喺呢度call車，比喺曼谷方便同埋快捷，通常一call即有！姐姐過往喺泰國call uber,通常要等五至10分鐘，又成日都搵唔到個司機，但係喺呢度，一次都未試過呢啲嘅困難）

酒店行出去就係沙灘！就算找一天全日喺酒店Hea，姐姐覺得好值得！嗰日太大浪，唔可以游水，不過唔緊要因為姐姐根本唔識得游水 ^ _ ^！沙灘嗰張凳，坐咗落去係起唔返身！因為實在太過舒服.... 又有千秋打，又有陣陣涼風，咁着條大毛巾啱啱好，唔會冷親。

呢間酒店另一個特色就係，有日式溫泉，個水溫仲非常舒服適中，有時去到日本浸嗰啲都太過熱，呢樹真係啱啱好！訂既時候都唔知道原來有溫泉，真係幾驚喜，又舒服。另外好玩嘅就係免費可以借越南裙穿，非常有趣！房間亦都有越南帽同藤籃你使用。出出入入例如去浸溫泉好方便！

同埋呢度嘅早餐真係好出色，可以食到11點！瞓得晏都仲可以慢慢食！

款式亦都好多好豐富，有迷你法包，又有河粉～


非常推介：https://www.grandvriooceanresortcitydanang.com/en/

姐姐咁讚好呢間酒店，希望大家唔好以為佢收咗小費，哈哈！純粹個人經驗真係良好～ 仲有呢機嘅職員真係好友善， 非常之helpful~ 姐姐佢哋回程晚上八點鐘飛機、酒店職員話俾佢哋將行李放喺佢哋係同group 係 City嗰間酒店= 即係Grandviro City（咁當然係自己帶行李過去啦，不過佢哋預先聯絡左City嗰間酒店）！就喺City酒店附近食埋晚飯行多一陣去機場就啱啱好！呢個安排真係好perfect~

交通方面: 全部都係CALL GRAB TAXI, 很方便! 一CALL即有車, 不用再雞同鴨講目的地, 價錢一清二楚。街上好多司機問你要不要車, 不用理會, 直接CALL GRAB就可以了, 尤其係機場, 完不要理果D來兜搭既司機。個人覺得GRAB好用過UBER, 更清晰!